Il patratg digl iniziant Willy Decurtins, che fitschentava el gia daditg da saver endrizzar el vitg in local da bigliard ei daventaus realitad. Ina purschida ch’ins anfla buca en mintga vitg e che tschenta spert la damonda; ei quei insumma dumandau cheu tier nus. Mo tgi ch’ughegia nuot, ha da spiarder nuot di il proverbi, ed igl ei gartegiau.

Suenter madirs discuors denter amitgs ed enconuschents han diesch suttascret il formlar d’entrada sco commember activ e fundau ils 7 da december 2007 il club da bigliard e numau el «CLUB 07». Cheu ils fundaturs en successiun alfabeta: Bass Anton, Bass Otto, Bearth Vitus, Cathomas Marc, Decurtins Willy, Deplazes Michel, Flury Marcus, Jacomet Werner, Janka Giusep e Schmid Josef. Mintg’in ei promts da pagar ina taxa annuala da 100 francs. Els han affitau il local sut la sala veglia dil hotel Greina e cumprau ils requisits necessaris e creau in reglament e reglas pil niev club. Per levgiar il buordi finanzial han els recrutau commembers passivs, ils schinumnai promoturs, ils quals pagan ina taxa da promoziun annuala da 50 francs e las taxas da giug sco commembers. Ils emprems promoturs ein stai: Camenisch Riccardo, Candinas Beat, Degonda Giachen, Galluzzo Salvatore, Jacomet Tarcisi, Janka Pauli, Maissen Alfons, Maissen Daniel e Walder Olga.

Cun l’entschatta 2008 han ins entschiet a dar bigliard ed ei era per enqualin buca sempel da tener dapart las reglas e co tener il «queue» sco il fest da stuschar las ruclas vegn numnaus. Da Pastgas 2008 ha giu liug igl emprem turnier intern denter 9 commembers e 4 promoturs che ha cuzzau 3 dis. Victur ei stau il commember Giusep Janka suveranamein. Suenter ina sesiun han tuts anflau ei per in lassi giug e stai promts da continuar. Aunc quei onn ei vegniu engrondiu il local cun allontanar ina preit da spartida, dau da niev colur, cumprau ils indrez necessaris ed era la secunda meisa da giugar. Ussa posseda il CLUB 07 in bi e grond local cun neginas munconzas materialas.

Oz, 13 onns pli tard, vegn aunc adina giugau stedi bigliard. La stagiun d’unviern ei la stagiun da trenament ed ei vegn exercitau mintgamai il mardis e la gievia sera en duas gruppas. La stad ein ils exercezis facultativs per tgi che vul mintgamai la mesjamna sera. Duront igl onn ora vegn organisau plirs turniers sco per exempel duront il temps da Pastgas. Cun l’entschatta da 2020 dumbrava il Club07, 13 commembers activs e 25 commembers passivs.

LM52