Quest raquent sebasa sin fundament dils protocols ch’ein avon maun dapi la fundaziun. Gia onns avon la fundaziun vegnevan las dunnas mintgamai igl gliendisdis-sera ensemen ella sala da scola per far lur gimnastica. Cruschont quei di cul temps che l’uniun dramatica era vidlunder cun las emprovas da teater, haveva lezza la preferenza dalla halla. E per buca schar ora quella sentupada eran ellas, sin proposta da Margrita Deplazes-Derungs, serendidas si ell’aula per cantar canzuns da cumpignia. E quei tunava detg flot e plascheva allas dunnas da gimnastica. Sin invitaziun passavan ellas era si tier pintgas occasiuns cun delectar ils giubilars. Margita Deplazes haveva in fin e bien dun da cant, eis ella gie sora dil renomau cumponist Gion Antoni Derungs, ed era s’annunziada sco candidata per la suprastonza dall’uniun da cant federala. Mo leu stuevan talas persunas appartener ad in chor. E tras quei han ins lu bein spert fundau, ord quella gruppa da gimnastica, l’uniun cul num «Gruppa da cant Rabius».

Ils 19 d’avrel 1989 serendan las 25 dunnas ell’aula per fundar quei chor. Las statutas eran gia lu preparadas ed ein vegnidas approbadas unanim quella sera. La nova ed emprema suprastonza ei vegnida elegida. Mintga commembra pagava la contribuziun annuala da 30 francs. Per giubilaras da 70 onns e sura vegnev’ei cantau tier lur fiasta. E commembras d’honur daventav’ins suenter ch’ins haveva cantau 20 onns en quei chor.

Duront quels 20 onns activitad ei il chor staus fetg activs. Regularmein vegneva ei cantau ina gada per onn ellas casas da vegls a Cumpadials ed a Trun sco era el spital regiunal a Glion. Demai ch’il chor viril haveva dau si l’activitad ha il chor da dunnas surpriu il program da cant en baselgia. A 6 fiastas da cant ha il chor da dunnas priu part e recaltgau fetg buns predicats. Per mantener ina buna atmosfera el chor vegneva ei organisau seras da famiglia, sentupadas da s. Clau e da Nadal, fiastas da natalezi, viadis e sentupadas cun auters chors e.a.v. Mo da recrutar commembras mava ei fetg vess, oravontut forzas giuvnas. En quels onns hai dau biaras mutaziuns d’entradas e d’extradas.

Ina gronda surpresa hai dau cura che la versada dirigenta Margrita ha fatg da saver ch’ella banduni il chor da Rabius e seretili ella bassa. Igl encurir in ni ina dirigentA ei stau sco d’encurir ina guila el ladretsch. Mo igl encurir ei staus adumbattens e la radunonza extraordinaria dils 14 d’avrel 1999 ha purtau nuot auter che la votaziun da dissoluziun dall’uniun. La davosa radunonza generala ha giu liug ils 22 da zercladur 1999 nua ch’ins ha schau reviver il passau duront quels 20 onns ch’ins ha cantau ensemen. Tenor rapport dalla dirigenta Margrita seigi dapi la fundaziun vegniu cantau tier 6 fiastas da cant, cantau a Zorten alla concurrenza dils chors da dunnas e cantau ensemen cul chor Aurora da Rueun. 2 gadas seigi vegniu cantau ensemen cul chor viril da Lucerna. Era seigi vegniu cantau biaras gadas pil pelegrinadi a Selva ed era ellas casas da vegls. Era sin viadis seigi vegniu cantau en diversas baselgias sco a Venezia ella baselgia da San Marco ed a Prag ella baselgia da Sogn Loreto. En quels 20 onns da cant seigi vegniu passentau zun biaras uras nunemblideivlas e las cantaduras seigien adina stadas fetg flexiblas. Per quei bi temps engrazia ella a tuttas cantaduras ed alla suprastonza.

LM52