La pleiv da Rabius steva cuort avon siu giubileum da 100 onns pleiv independenza e steva senza chor baselgia. Per il president dalla pleiv da lezzas uras fuss quei giubileum senz’in chor baselgia staus sco ina suppa senza sal. Sin sia iniziativa e cun ina circulara tral vitg per metter sin quella fiasta en pei in chor mischedau adhoc eran pli che 30 persunas s’annunziadas. Retus Giger da Surrein haveva lu dau tier sco dirigent da mussar per quell’occasiun ina messa ed entginas canzuns sacralas. Cantau ei vegniu la messa en C-dur d’Anton Bruckner, ina messa d’aulta qualitad e fetg pretensiusa per in chor noviz. Mo la motivaziun e bien spért dil chor ha demussau che quei ei stau pusseivel. La baselgia parochiala era sin quei giubileum vegnida restaurada egl intern e resplendeva en niev vestgiu, clara e moderna.

Enteifer quels dus onns da preparaziun haveva il chor ad hoc fatg in enorm progress e la fiasta da giubileum 2001 stada in success cumplein. Gie suenter quei success e lauds da tuttas varts e sin damonda da vuler mantener quei chor vinavon u forsa schizun fundar el, ein tuts stai incantai ed era il premurau dirigent Retus ha schau pladir sco emprem dirigent. Retroactiv ei il chor mischedau (CM Rabius) vegnius fundas igl onn 1999. Suenter la fundaziun dil chor, che haveva la funcziun dubla, chor profan e chor sacral, ha ei giu num d’emprender en canzuns per omisduas funcziuns. Aschia vegneva buca mo enqualga dau in concert sacral ni profan mobein era priu part a fiastas da cant districtualas u cecilianas nua ch’il chor ei oz era commembra.

LM52