Questa historia sebasa sin ils statuts, protocols e cronicas avon maun. Deplorabel mauncan tals entochen igl onn 1936. Mo tenor ils statuts ei il chor viril da Rabius (CVR) vegnius fundaus igl onn 1900, in onn avon che la pleiv da Rabius ei sefatga libra dalla mumma pleiv da Sumvitg, sco ella vegneva numnada e fundau si’atgna pleiv. Quei onn ei era la cumpignia da mats da Rabius vegnida fundada ed era ina gruppa da 13 musicants che sunavan entochen lu cun la musica da Sumvitg. Aschia possedeva la pleiv ussa las treis uniuns ch’ei duvrava per las paradas tier las fiastas ecclesiasticas. E da daventar commember dil CVR da lezzas uras era buca aschi sempel. Lura stuevan era il bab, tat u padrin appartener al chor ed il dirigent dar giu in bien pareri dalla persuna, schiglioc havevan ins negina schanza da davetar commember da tal.

L’emprema mesadad dil tschentaner (1900-1950) ei il CVR staus fetg engaschaus ella part cant sacral. Bunamein mintga dumengia vegneva cantau messa e suenter miezdi vegneva cantau las viaspras latinas cun psalms ed antifonas. E las antifonas lu buca mintga cantadur che astgava cantar solo. Quei mava suenter in ritmus fix e caussa dils pli vegls cantadurs. Ed enqual ga caztgava ei als giuvens cantadurs dad esser pli sperts da cantar e da tschappar giu ina u l’autra antifona dils vegls. Quei deva lu egliadas nauschas e detgs sburbatems. Per nus affons che stuevan era esser presents allas viaspras latinas u era allas mudinas (laudes) che havevan liug il temps dall’jamna sontga sin latin e nuot capeivel, eran lungurus e cuzzavan per maina calar. Il cumplet vegneva schau cantar la sera da rusari dils matatschs ed entuorn l’orgla che vegneva sunada da scolast Casper Berther. In immens pensum curdava da lezzas uras al CVR.

La secunda mesadad dil tschentaner (1951-2002) suenter ils 2. conzil vatican (1962-1965) ch’ei vegnius convocaus da papa Gion il 23avel ha purtau la gronda midada ella baselgia. Ins ha lura astgau cantar messas romontschas e buca mo latinas. Igl ei niev vegniu legiu messas enviers il pievel davos igl altar per romontsch e buca sco avon cul dies encunter il pievel. Quels onns ei segir vegniu strihau la mesadad dils firaus e trasquei ei igl engaschi dil chor en baselgia sesminuius empau. Pli e pli vess vai da recrutar novas forzas giuvnas. Igl onn 2000 havess il Chor viril Rabius saviu festivar siu 100avel onn d’existenza, mo senza cantadurs e dirigent negin motiv da far fiasta. Onns da passivitad, adina cul patratg ei vegn forsa schon aunc in di, ei ius a fin e la dissoluziun dil Chor viril Rabius ha giu liug e vegnida decidida tier la radunonza dils 25 da matg 2002.

Suenter la dissoluziun dil chor ein entgins cantadurs restonts dil Chor viril da Rabius (mira davosa foto digl onn 2002) setratgs a Trun e cantau leu entgins temps el Chor viril da Trun ch’era ella medema situaziun sco il CV Rabius e dumbrava mo pli ina tiarza dils commembers. Ei ha buca cuzzau ditg ch’era il CV da Trun ha stuiu communicar la dissoluziun dil chor, in chor cun gronda activitad, tradiziun ed impurtonza per la vischnaunca da Trun.

LM52