Uniun da mattauns

Ils 10 d’avrel 1960 han las mattauns fundau lur uniun cul num «Uniun da mattauns Rabius» (UmR). Gia ditg avon deva ei l’Uniun da dunnauns e mattauns Rabius. Mo da lezza exista ei negins cudischs da protocol u cronica. Sco la cronica paleisa, che vegneva mintgamai scretta dalla presidenta, havevan las commembras dalla UmR dabia lavur en in onn ora. Lur lavur principala era duas gadas per onn lavar ora la baselgia e duas entochen treis gadas per onn vegneva il santeri, ils rosès e via zercladas e schubergiadas. Il gidar las mattauns tier lavar ora la baselgia era per ils mats caussa da princip.

Savens eran ellas fitschentadas vid far tschupials per nozzadurs e quei curdava duas entochen 3 gadas per onn, lu tschupials per vischals da baras da persunas ledias, per fiastas da baselgia e per autas fiastas dil vitg. Il pli bugen ornavan ellas igl altar da Nossadunna e havevan quitau per el igl entir meins da matg. Enteifer dus onns han ellas fatg meters e meters da tschupials per las messas nuvialas da sur Pauli Deplazes e sur Ciril Berther. Igl onn 1965 ei stau fiasta da musica a Rabius e quei ha tuccau allas mattauns da far seras en e seras ora tschupials e da segidar cun la musica.

Tier las sontgas Missiuns che havevan liug mintga 10 onns el vitg vegnevan las mattauns envidadas sulettas a seras da referat cun temas da sexualitad e lètg. Ina gada egl onn vegneva fatg in viadi communabel e quei era adina in bi e legher eveniment. Mintg’onn envidavan ils mats ellas ad in tscheiver general ed ord quel naschevan meinsvart amicablas amicezias.

Cun leger atras las cronicas ei dau en egl ch’ei vegneva envidau pli e pli savens tier occasiuns dils mats era las mattauns. Sin iniziativa dil capitani da lezzas uras, Linus Maissen, 46, e cun sustegn dalla davosa presidenta, Augusta Bearth, ei il giavisch per ina fusiun denter la Cumpagnia da mats e l’Uniun da mattauns Rabius sut il num « Uniun da giuventetgna Rabius » ida igl onn 1970 en vigur. Da quella fiasta da fusiun savein aunc seregurdar fetg bein. Tala ha giu liug en casa da scola e las mattauns havevan organisau tut ed era pagau tut. Jeu crei d’astgar dir ch’ils pli biars eran la damaun buca i persuls a casa.

Sch’ins persequitescha sura il temps d’uffeci dallas presidentas, sche croda ei si beinspert che tal survargava mai ils 2 onns. Ins suppona ch’ins leva dar a biaras quell’honur d’esser parsura mo las pli biaras han remess igl uffeci muort maridaglia u per autras raschuns.

LM52

Til dallas mattaunas e mintg’ina cun tschuppi tier la messa nuviala da sur Pauli Deplazes 1962

Viadi dall’Uniun da mattauns Rabius 1966 el bi marcau da Milaun cul dom davostier

Pausa da refrestg sin viadi a Milaun 1966