Ina fusiun dat segirtad e segirtad dat forza. Per spindrar la societad da musica Rabius d’ina dissoluziun, ei suenter in onn d‘emprova cun la societad da musica da Surrein, vegniu fundau ils 9 d’otober 2009 la nova societad cul num: «Societad da musica Surrein/Rabius». Ins ei stai incantai da quei pass ch’enrihescha omisdus vischinadis e che gida da mantener ina musica instrumentala speronza aunc biars dis ed onns. Sco dirigent dalla nova societad fusionada ei Guido Bass staus, el dirigeva gia la societd da musica Surrein avon la fusiun.

Duront treis onns passa la musica si en las duas monduras d’avon la fusiun. Rabius en sia biala mondura grischa e Surrein en sia biala mondura blaua. Per era saver mussar anoviars in’unitad eis ei per tuts clar ch’ei drova in’uniforma per la nova societad. Il medem vala ei per las bandieras –las quallas vegnevan purtadas omisduas duront las paradas. La nova mondura ner/antracit ei cun ina camischa verda ei vegnida cusida da Manuela Gobetti-Lutz (Art da moda). La bandiera nova ei vegnida delineada da Paul Mathias Cathomas. L’inauguraziun ha giu liug ils 26 d’uost 2012. Madretscha dalla nova bandiera ei Silvia Solèr-Degonda ed il padrin ei Cathomas Beni.

Cun la fusiun dallas duas musicas ein era duas differentas modas da far musica vegnidas ensemen. Surrein fageva bugen buna musica sin nivel mudest, per igl auditori senza ambiziun da far musica sin nivel d’aulta categoria. Rabius perencunter haveva sunau els buns onns en categorias pli aultas ed eran premurai d’exercitar per far buns resultats allas fiastas da musica. Sut differentas direcziuns havevan els fatg musica sin ault nivel. Duront ils emprems onn ha la societad da musica Surrein/Rabius sunau sin livel da quarta classa e priu part alla fiasta da musica districtuala a Trun. Cun la midada d’il dirigent ei era il livel da musica semidaus e la societad da musica ha exercitau tocs da tiarza categoria. Igl onn 2013 ha la musica lu era priu part alla fiasta cantunala a Cuera en la tiarza categoria. Sco tier las biaras uniuns d’in vitg dat ei muments da crisas e munconza da motivaziun per continuar. Quei ha era la musica da Surrein/Rabius stuiu far per senn. Memia biars musicants ein extrai duront ils davos onns e memia paucs entrai. Ed era las differentas perspectivas da far musica sco era las midadas d’il livel e stil han menau tier differenzas enteifer la musica cun consequenza da munconza da motivaziun e pliras direcziun. Per reflectar la crisa, la munconza da commembers e motivaziun sco era per rimnar ils giavischs dil musicants en tgei direcziun ira cun la musica ei vegniu clamau per ina radunonza extraordinaria. Cun la radunonza generala digl atun 2016 ha ei dau entginas midadas en la suprastonza ed il post da dirigent ei staus vacants duront ina sesiun. Duront in onn ha la societad fatg musica cun ina sligiaziun transitorica ella direcziun musicala ed ei sepresentada per duas pintgas occurenzas (tscheiver a Sumvitg ed pign concert en Casa S. Giusep). Malgrad la sligiaziun transitorica ein suenter biars onns puspei treis giuvenils entrai en la societad. Per animar aunc dapli giuvenils da sunar in instrument da stuors ei vegni menau atras per l’emprema gada in «Experiement cun instrument da stuors» duront in suentermiezdi. Il resultat ei staus; 20affons interessai e treis che han silsuenter entschiet en cun la scolaziun. Per che la societad hagi puspei in direcziun musicala fixa ei la suprostonza ida cun agid da tut ils commembers alla tscherca d’in niev dirigent. Era sch’igl ei buca stau sempel eis ei reussiu ad els da presentar alla proxima radunonza generala 2017 il niev dirigent. Cun Claudio Carigiet eis ei suenter in onn puspei stau pusseivel da far exersecis en fuorma regulada ed preparar in concert primavaun. Dapi la sesiun 2017 suna la societad sut la direcziun da Claudio Carigiet ed ha menau atras concerts e differentas fuormas a Rabius sco a Surrein. Per animar e promover ils talents musicals dils giuvenils dalla musica ha il dirigent Claudio Carigiet clamau en veta la „Cool Band“ igl onn 2019. Dapi lu pren la Cool Band part ni organisescha ina u l’autra occurenza era independenta dalla societad da musica Surrein/Rabius.

Ils 29 da december 2018 ha igl aunghel dalla mort clamau a casa siu survient Vitus Berther. Per la musica ina gronda e nunspitgada frida da stuer piarder in da ses pli vegls e fideivels commember activs. La musica ha dau honur ad el cun sunar tier la messa funerala e sur fossa il toc da cumiau. A Vitus in cordial engraziament per tut il prestau en favur dalla musica. El ruausi en pasch.

LM52