Uniun «Rabius anavon»

Cun la radunonza extraordinaria dil vischinadi da Rabius dils 22 da november 2019 ei l’uniun «Rabius anavon» vegnida fundada che passa en vigur cun 1. da schaner 2020. Cheu san mo aunc ils statuts plidar.

1. Num e sedia
Sut il num Rabius anavon exista in’uniun tenor ils artechels 60ss CCS cun sedia a Rabius.

2. Finamira ed intent dall’uniun
La finamira dall’uniun ei:
a) da tgirar e promover la cuminonza dil vitg
b) d’inoltrar propostas d’elecziun, giavischs da preventiv, iniziativas e petiziuns generalas per mauns dils organs da vischnaunca
c) da promover il svilup dil vitg e la veta sociala e culturala da quel
d) da tgirar il maletg e la cuntrada en ed entuorn il vitg
L’uniun intenziunescha da contonscher sia finamira ord atgna activitad en collaboraziun cun las uniuns dil vitg, autras instituziuns ni iniziativas privatas.

3. Commembradi
Commembers dall’uniun san persunas naturalas e giuridicas (uniuns, fundaziuns e fatschentas) daventar. Il commembradi vegn acquistaus cun conclus dalla radunonza generala e terminescha cun la declaronza d’extrada sin la fin digl onn calendari, cun la mort, cun la dissoluziun ni cun la decisiun d’exclauder, la quala ei prida dalla radunonza generala muort motivs gravionts.

4. Inventari
Cun la dissoluziun dil vischinadi da Rabius e dallas uniuns reunidas da Rabius surpren l’uniun lur inventari existent che secumpona ord: meisas e suppias, podiums e scalas dalla sala ed igl entir inventar dalla cuschina nova. La lubientscha e la taxa da diever digl inventari surdat la suprastonza dall’uniun.

5. Organs dall’uniun
Ils organs dall’uniun ein:
a) la radunonza generala
b) la suprastonza
c) il post da revisiun
d) il/ils responsabel/s digl inventari

6. Radunonza generala
La radunonza generala deliberescha per regla las suandontas fatschentas:
a) eleger la suprastonza ed ils revisurs
b) approbar il protocol dalla radunonza generala
c) deliberar ed approbar il rendaquen annual
d) fixar las contribuziuns annualas
e) votaziun dallas mutaziuns da commembers
f) decretar ni midar statuts
g) approbar il program da lavur

7. Convocaziun
La radunonza generala vegn clamada dalla suprastonza ina gada per onn sil pli tard il davos dil meins da mars. Ils commembers vegnan envidai alla radunonza silmeins 10 dis ordavon cun scriver, e-mail ni auters mieds da publicaziun cun aschuntar la gliesta da tractandas ed il protocol dalla davosa radunonza generala. Scadina radunonza convocada ei cumpetenta da decider. Radunonzas extraordinarias san vegnir convocadas tenor basegns entras la suprastonza ni entras minimum 15 vuschs. Il motiv per la radunonza extraordinaria ha da daventar a scret indicont il motiv dalla tractanda.

8. La suprastonza
La suprastonza secumpona dil president, digl actuar, dil cassier e da 2 assessurs. Il temps d’uffeci munta a 2 onns ed els ein reelegibels.
a) Il president meina l’uniun, las radunonzas e liquidescha la gestiun da mintgadi.
b) Igl actuar redegia ils protocols dallas radunonzas e sedutas e funcziunescha sco vice-president.
c) Il cassier meina il quen ed incassescha las contribuziuns. El presenta quel alla radunonza generala.
d) Ils assessurs stattan cun plaid e cussegl a disposiziun e san surprender lavurs adossadas ad els.

9. Incumbensas e cumpetenzas dalla suprastonza
La suprastonza ha las suandontas incumbensas e cumpetenzas:
a) direcziun dalla gestiun dall’uniun e representaziun anoviars
b) clamar e menar la radunonza generala
c) preparar ed organisar il program da lavur
d) administraziun dalla facultad dall’uniun
La suprastonza ha la cumpetenza da tuttas fatschentas ch’ein buca menziunadas en artechel sis ni ch’ein buca adossadas expressivamein ad in auter organ. La suprastonza sa surdar singuls pensums ni incaricas ad auters commembers ni engaschar gruppas da lavur cun incumbensas specialas. L’uniun s’obligescha entras suttascripziun collectiva dil president e dil cassier ni dil president e digl actuar. La suprastonza ha la cumpetenza da disponer sur da francs 3000 per onn. Ella sa organisar e finanziar occurrenzas e fiastas ch’ein egl interess dall’uniun. La suprastonza decida en atgna cumpetenza sur dils basegns dallas fatschentas.

10. Convocaziun a sedutas da suprastonza
Las sedutas da suprastonza vegnan convocadas dil president. Vegn il president buca suenter a quell’obligaziun, san ils auters commembers da suprastonza clamar tala. La suprastonza ei habla da decider, sch’il pli dils commembers da tala ei presents. Per conclus dalla suprastonza vala il principi da collegialitad.

11. Post da revisiun
Il post da revisiun secumpona da dus revisurs da quen. Quels procuran la revisiun dil quen annual e stattan cun plaid e cussegl a disposiziun alla suprastonza. Il temps d’uffeci munta a dus onns ed els ein reelegibels.

12. Il/ils responsabel/s digl inventari
Il/ils responsabel/s digl inventari ha/n la survigilonza e la responsabladad digl inventari dall’uniun. Il schubergiar la cuschina vegn surpriu dall’uniun organisonta sut survigilonza dil/s responsabel/s digl inventari. Donns caschunai vid indrezs ein d’annunziar immediat ad el/els e da surprender dall’uniun organisonta. La lubientscha per astgar far diever da suranumnau inventari dat la suprastonza dall’uniun che fixescha era la taxa da diever.

13. Gestiun finanziala
Las expensas dall’uniun vegnan cuvretgas cun:
a) contribuziuns dils commembers
b) entras incasso pil diever digl inventari da tiarzas pesunas
c) donaziuns da sponsurs ed ulteriur recav
Igl onn da gestiun ei identics cugl onn calendari.

14. Indemnisaziun
Ils organs dall’uniun retscheivan ina indemnisaziun per cuvierer lur spesas ch’ein stipuladas en in reglament separau.

15. Votaziuns ed elecziuns
Votaziuns ed elecziuns succedan per regla cun maun-pli num ch’ei vegni pretendiu scrutini. Tier votaziuns decida igl absolut pli e tier elecziuns il relativ pli. Uniuns, fundaziuns, instituziuns e fatschentas obtegnan mintgamai 5 vuschs e persunas singulas mintgamai 1 vusch. Hosps envidai alla radunonza han negin dretg da vuschar.

16. Egualitad dallas schlatteinas
Scadinas funcziuns, nominaziuns ed indicaziuns da persunas en quests statuts serefereschan sin omisduas schlatteinas.

17. Midadas dils statuts
Midada dils statuts san succeder entras 2/3 dallas vuschs dils commembers ch’ein presents alla radunonza generala. Giavischs per midadas da statuts ston vegnir inoltrai alla suprastonza entochen la fin digl onn calendari.

18. Dissoluziun dall’uniun
La dissoluziun dall’uniun sa vegnir decidida sche 3/4 dallas vuschs dils commembers presents alla radunonza generala giavischan quei. Davart la facultad ed inventari decida quella radunonza.

19. Vigur dils statuts
Ils statuts vertents ein vegni approbai tier la radunonza da fundaziun dis 22 da november 2019 e passan en vigur cugl 1. da schaner 2020.

LM52