Uniuns reunidas

Quella historia sebasa sin las statutas dall’uniun revedidas ils 19-3-2003 e dils protocols. Sut il num «Uniuns reunidas Rabius» era vegniu fundadu igl atun digl onn 1964 ina uniun che secumponeva da pliras uniuns dil vitg e quei suenter che la scola nova ei vegnida surdada a siu intent. Ultra d’ina sala da gimnastica ha la vischnaunca da Sumvitg erregiu ina tribuna per diever dallas uniuns e scolas dil vischinadi. Ils cuosts dils indrezs per diever dallas organisaziuns e producziuns ein vegni surschai al vischinadi da Rabius. Perquei motiv ein entginas uniuns seunidas per procurrar las necessarias investiziuns. Igl indrez da tribuna cun las installaziuns electricas da glisch e reflecturs sco era ils cundrezs da microfons ed aultplidaders, tendas e sofitas e plinavon meisas e sutgas sco era igl entir indrez da cuschina ed inventari da vischala eran en proprietad dallas uniuns reunidas. Ina gronda summa d’investiziun che biars vischins han gidau d’amortisar. Quei entir inventari steva a disposiziun allas uniuns che promovan la cultura e l’unitad enteifer il vitg. Culs onns ha lu la vischnaunca priu giu empau da sura numnau inventar e surschau allas uniuns reunidas aunc las meisas e sutgas, scala e podiums per la sala ed igl entir indrez cun vischala dalla cuschina nova. Commembers dallas Uniuns reunidas Rabius ein restai il davos aunc: la societad da musica Surrein-Rabius, il chor mischedau Rabius, l’uniun da giuventetgna Rabius, l’uniun da dunnas Rabius, l’uniun da gimnastica da dunnas Rabius, l’uniun sportiva Rabius. Uniuns dissoladas ein automaticamein exclausas dallas Uniuns reunidas Rabius.

Mintg’uniun era obligada da tarmetter 2 delegai alla radunonza generala che haveva liug mintga 2 onns. Ord il miez da quels vegneva la suprastonza elegida per 2 onns ed era adina puspei reelegibla. Las uniuns da commembradi gudevan tuttas ils medems dretgs ed obligaziuns. Ellas pagavan mintgamai ina contribuziun annuala da 70 francs. Ils mieds necessaris per tscheinsir ed amortisar ils deivets sco era per finanziar novas investiziuns vegnevan recaltgai cun organisar mintga 2 onns ina sera da famiglia. Plinavon cun incassar dallas uniuns buca commembras che fagevan diever digl inventari dall’uniun 10% dil recav schuber dall’occasiun che vegneva menada atras. Alla fin da 2019 havevan las Uniuns reunidas negin deivet pli, gie schizun aunc in per daners d’anvons.

Culs 1-1-2020 ein las Uniuns reunidas Rabius fusiunadas cul Vischinadi Rabius tier ina nov’uniun cul num « Rabius anavon ». Las duas uniuns ein vegnidas dissoladas e las bilanzas ed inventari da rauba ein idas vi en possess alla nov’uniun Rabius anavon. Ils novs statuts ein vegni approbai tier la radunonza da fundaziun dils 22-11-2019. Rabius posseda ussa era sezza ina pagina d’internet cun l’adressa : www.rabius.ch che presenta la historia dil vitg per romontsch e tudestg, cun fotos da baghetgs vegls dil vitg e historias dallas uniuns dissoladas ed activas. Ina interessanta caussa e che vala la peina da leger e sefitschentar.

LM52