Uniun sportiva

L’uniun sportiva Rabius (USR) ei vegnida fundada ils 22 da matg 1941. Deplorabel ein ils cudischs dils emprems 50 onns dapi la fundaziun buca pli avonmaun ni che schaien enzanua sin in sur combras d’in suprastont cass. L’uniun ha l’intenziun da tgirar e promover il sport entras: trenadis da gimnastica, cuors specifics, excursiuns, arranschaments da concurrenzas sportivas, visitar occurenzas sportivas e recreaziuns.

Las spartas da sport han strusch cunfins. L’ USR ha gia all’entschatta giu formau ina equipa da ballapei, ina equipa da stafetta e lu pli tard, suenter che la halla da gimnastica dalla scola nova ei vegnida dada libra a siu intent igl onn 1964, han aunc auters resorts sportivs saviu vegnir realisai. Ins ha formau gruppas da gimnastica per in e scadin, dau giugs da ballareit e da ballacanaster, menau atras turniers da ballareit, dau cuors da JO ed aunc autras caussas. Plinavon ei vegniu organisau turas da skis, turas cun velo, cuors per cuorsa liunga, excursiuns e turas a pei, scursaladas, dis da sport e divertiment ad Igniu ed aschia vinavon.

Ils 10 ed 11 d’uost 1991 ha l’USR saviu festivar siu 50avel onn d’exsistenza. Per quella caschun ei vegniu organisau in turnier da ballapei ad Igniu cun 8 equipas en 2 gruppas. Gruppa 1: Mustér, Trun/Rabius I, Tavanasa II, Lumnezia. Gruppa 2: Trun/Rabius II, Tavanasa I, Rueun, Val. Per mintga equipa ha quei tuccau da giugar 3 giugs à 30 minutas. Avon ils giugs finals ha ei aunc dau in giug d’attracziun denter la damas dil CB Laax/Surselva ed il FC Diepoldsau. Per divertiment ha la musica da sault Trio Tamangos sunau la sonda sera en tenda da fiasta.

Gia tier il giubileum da 50 onns USR ha Rabius, per saver porscher 1 ent. 2 equipa da ballapei tier il turnier da giubileum, stuiu semetter ensemen cun Trun per formar duas equipas da ballapei. Quei patratg era buca naschius per lu da fusiunar tier in sulet club da ballapei. Pertgei omisdus clubs pitevan d’ina digren da commembers. Tier la radunonza generala dils 12 da schaner 1991 ei la fusiun cul club da ballapei Trun daventada realitad e vegnida numnada da niev «CB Trun/Rabius». Unitad dat forza ei semussada, pertgei oz posseda il CB Trun/Rabius da pliras equipa da ballpei da num e pum.

Gia dapi la fusiun dall’equipa da ballapei cun il CB Trun/Rabius ha ina stauncladad dils commembers e dallas commembras sefatga valer. Pli e pli biars han inoltrau lur demissiun e pli e pli biars han mussau lur nuninteressenza. Ei maunca adina la peda per interprender enzatgei ensemen e negin vuleva pli surprender posts da responabladad ed en suprastonza. Quei ha menau che la dissoluziun dalla «Uniun sportiva Rabius» ei stada tier la radunonza extraordinaria dils 17-01-2020 nuneviteivla. Ils 13 commembers presents han unanimamein decidiu da sponsurar la facultad restonta ad ina instituziun d’affons basignus.

LM52

La stafetta dils curriders a Glion ha purtau igl onn 1942 il 2. rang. Davos da seniester: Albert Baselgia, Fidel Tuor, Victor Beer, Emil Beer. Davon da seniester: Robert Soliva, Anton Soliva, Clau Baselgia, Albert Candinas, Placi Soliva, Luis Lutz.

L’emprema equipa da ballapei 1942. Sin peis da seniester: Richard Deplazes, Albert Candinas, Anton Soliva, Benedetg Baselgia, Vic Baselgia, Clau Baselgia, Thomas Baselgia. En schanuglias da seniester: Giusep Tgetgel, Fidel Tuor, Clemens Maissen, Marcel Beer, Meinrad Tuor.

L’equipa gudignadra dalla cupa grischuna 1958. Sin peis da seniester: Rudolf Bearth, Alex Saluz, Dumeni Maissen, Giusep Deplazes, Alfons Deplazes. En schanuglias da seniester: Pius Bearth, Aluis Maissen, Mudest Berther, Adalbert Deplazes, Fidel Deflorin, Lorenz Maissen, Guido Maissen.

Equipa da ballapei dils onns 1966 – 1968. Sin peis da seniester: Fidel Deflorin, Bernard Bearth, Giusep Deplazes, Marcus Cagienard, Linus Maissen, Dumeni Maissen, Flurin Deplazes, Alfons Deplazes, Robert Lechmann. En schanuglias da seniester: Paul Wenzin, Giachen Degonda, Guido Mathiuet, Gieri Maissen, Sigisbert Cavegn.

Equipa da ballapei dils onns 1984 – 1986, ch’ei vegnida promovida dalla 5. en la 3. ligia.

Davos equipa da ballapei dall’uniun sportiva Rabius 1990.