Uniun da tamburs

Duront in’existenza da varga 60 onns havess in’uniun da rapportar ina massa caussas. Bials e meinsbials muments laian reviver nossas reminiscenzas da pli baul. Ils 7 da zercladur 1948 ei l’uniun da tamburs Rabius vegnida fundada. Alex Saluz da Domat ei entras la maridaglia secasaus a Rabius el vitg natal da sia dunna Sarah. El haveva empriu da rudien da schumbrar tier l’uniun da tamburs da Domat e capeva quei art sco buca in auter. El ei vegnius elegius sco emprem dirigent ed emprem president dall’ uniun da tamburs Rabius ed ha instruiu ils emprems tamburs.

Quei mava denton fetg vess havend els pauca experientscha da schumbrar. Biars han empruau ed era biars han calau muort emprendissadi e via professiunala. Ils 1950 han 2 tamburs da Rabius saviu absolver la scola da recrut sco tamburs militars, Gabriel Lutz ed Ignaz Maissen ed igl onn 1952 aunc Maurus Flepp e quei sut igl instructer da lezzas uras, Adj Uof Adolf Luterbach. Siu successur ei stau Adj Anton Wymann che fageva mintg’onn ina viseta all’uniun. Per l’uniun ei quei stau in grond avantatg ed entochen igl onn 2016 ein aunc ulteriurs 20 tamburs ord l’uniun daventai tamburs militars. Igl onn 1968 han ils tamburs da Rabius accumpignau il fundatur ed emprem dirigent Alex alla fossa. Muort grondas midadas da commembers ha ei dau enteifer ils onns 1950-1960 gronds disvaris e duront quei temps han buca meins che 5 instructers empallau l’uniun. 1960 ha Othmar Monn frequentau la scola da recrut sco tambur militar e surpriu suenter la bitgetta dall’uniun. Igl intent da schumbrar era en emprema lingia d’embellir mintg’onn las fiastas profanas ed ecclesiasticas dil vitg. Dapi igl onn 1956 entochen 2016 han ils tamburs da Rabius priu part a buca meins che a 25 fiastas da tamburs dalla svizra orientala, centrala, romande e federala. All’entschatta ella 2. categoria, pli tard lu ella 1. categoria. Tier fiastas da giuvens tamburs ha l’uniun da tamburs priu part 25 gadas cun singuls tamburs ed a 4 da quellas fiastas era aunc en secziun. 1987 ha ina tala fiasta schizun giu liug a Rabius e purtau all’uniun gronda honur.

Igl onn 2002 han novs disvaris menau tier l’abdicaziun d’in grond diember da commembers sco era dil dirigent. Sulettamein 6 giuvens tamburs activs han stuiu trer vinavon il carr ensemen cun agid dil comité. Demai ch’ils biars da quels eran duront l’jamna ella bassa a luvravar ni studegiar eis ei denton buca stau pusseivel da far regularmein exercezis resp. da promover giuvens tamburs per l’uniun. Tuttina eis ei gartegiau d’ademplir las occurenzas dall’uniun sin ina moda e maniera zun cuntenteivla. Enzacu ei lu il mument vegnius, nua ch’ils commembers han stuiu veser en, che l’uniun ha negin avegnir pli. En ina pintga gruppa eran las pusseivladads pintgas quei che pertucca igl art dil schumbrar. Da l’autra vart muncava igl interess pil schumbrar tier affons e tier la giuventetgna. Aschia ei il grev mument vegnius igl onn 2016, nua ch’ils commembers activs han priu la decisiun da sligiar si l’uniun da tamburs Rabius.

LM52

Ils emprems tamburs 1948 sut la bitgetta d’Alex Saluz (davos seniester)

L’Uniun da tamburs Rabius igl onn 1973 sut la bitgetta d’Othmar Monn (cun stab) nova uniformaziun e novs schumbers stil basler

L’uniun da tamburs Rabius igl onn 1998 sut la bitgetta da Victor Bearth (cun stab) ell’uniforma historica, inaugurada igl onn 1989 e cun schumbers da lenn