Ils 14 d’october 1994 ei il club da troccas Rabius vegnius fundaus. Igl iniziant, Willi Decurtins, ha giu clamau ensemen entgins simpatisants ed amitgs dil bi giug da troccas per endriescher con gronds ch’igl interess per fundar insumma in club da giugar regularmein troccas seigi. Ils presents ein stai incantai da quell’idea ed il club ei en in gienà staus fundaus.

Oz, 25 onns pli tard ei l’activitad aunc adina fetg buna. Commembras e commembers selegran da nossa concurrenza annuala sco era d’autras occasiuns da troccas. Buca meins che 60 trochistas e trochists han priu part da noss’uniun enteifer quels 25 onns. Mathilda Maissen ei la suletta ch’ei activa naven dalla fundaziun. In cumpliment sauda segir a nossas suprastonzas ch’ein duront quels onns stadas fetg activas. Sper nossa concurrenza annuala ch’entscheiva igl october e cuozza entochen miez avrel ei vegniu oganisau 10 turniers, 2 maratons ed 1 campiunadi grischun. Quei tut ensemen ei stau dabia lavur per il club.

Per saver organisar ina biala concurrenza basegna ei da silmeins 16 trochistas e trochists. Quei ei buca sempel en in vitg pign sco tier nus. Ord quels motivs havein nus stuiu encurrir giugaduras e giugadurs ord ils vitgs ella vischinonza. Buca tgi che gudogna ei igl impurtont mobein che nus vegnien ensemen ed hagien in per bialas uras en buna cumpignia cun ina occupaziun che plai. Quei auda gie tier nossa part sociala da nies vitg che ha pitiu bravamein ils davos onns. Lein perquei far tut il pusseivel da mantener vinavon quei bi usit.

Igl onn 2019 havein nus saviu festivar il giubileum da 25 onns existenza e sperein che nus saveien guder noss’uniun aunc biars dis ed onns. Perquei viva noss’uniun e viva il bi giug da troccas!

Gieri Maissen